ফিলিং ফেচবুক

এই ফেচবুকৰ পৰা উপায় নাই আৰু। তলৰ ঘটনাকেইটালৈ মন কৰিলেই বুজা যায়।

এক : মানুহ এজন দূৰ্ঘটনাত বৰ বেয়াকৈ আহত হৈছে।
এম্বুলেঞ্চত হস্পিতাল লৈ যোৱা হৈছে।
এনেতে কেকাঁই-জেকাঁই মানুহজনে ক’লে, অনুগ্ৰহ কৰি কোনোবাই মোৰ ফটো দুখনমান তুলিব নেকি? তেজ ওলাই থাকোঁতেই আপডেট দিবলৈ ভাল। লগে লগে ক্লিক্‌-ক্লিক্‌-ক্লিক্‌।
 ----“মোৰ এজন বন্ধুৰ আজি বেয়াকৈ বাইক এক্সিডেন্ট হ’ল। তেওঁৰ বাবে প্ৰাৰ্থনা কৰে যেন। ফিলিং ছেদ্‌।”

 দুই : দেওবাৰে ঘৰৰ কামবোৰ কৰি আজৰি হোৱাৰ পিছত সাধাৰণতে খুব বেছি ভোক লাগে।
 দুপৰীয়া দুই বাজি গ’ল। পতিয়ে টেবুলত বহি চিঞঁৰি আছে, “কি বনাই আছা হে? লৈ আহাঁ, ভোকত মৰিম এতিয়া।” ভাত-দাইল-হাঁহৰ আঞ্জা সকলো আহি গ’ল।
কিন্তু পত্নীয়ে হাতেই লগাবলৈ নিদিয়ে। ম’বাইলটোৰে প্ৰথমতে ক্লিক্‌-ক্লিক্‌-ক্লিক্‌।
 ----“দেওবৰীয়া বিশেষ- নিজ হাতে ৰন্ধা কলডিলৰ সৈতে হাঁহৰ মাংসৰ আঞ্জা। ফিলিং হাংগ্‌ৰী।”

 তিনি : ককায়েক খৰধৰকৈ ঘৰ সোমাইছেহি। ইমাৰ্‌জেঞ্চি, ডাঙৰবিধ।
ম’বাইল খুচৰি থকা ভনীয়েকক চিঞঁৰিয়েই ক’লে, “ঐ ভন্টী, জল্‌দি টাৱেল এখন দে। লেট্ৰিনলৈ যাওঁ।”
ভনীয়েকেও আনি দিলে। দৌৰি যোৱা ককায়েকক ক্লিক্‌-ক্লিক্‌-ক্লিক্‌।
 ----“দাদাৰ ইমাৰজেঞ্চি, হা হা হা। ফিলিং লাফিং।”

 চাৰি : ছোৱালীৰ বিয়া, বিদায় দিয়াৰ ক্ষণ। উপস্থিত সকলোৰে মনবোৰ সেমেকি উঠিছে।
মাক-জীয়েক দুয়ো কান্দি-কাটি বাউলী। কান্দি থকাৰ পৰাই মাকে জীয়েকক উদ্দেশ্যি, “ভালকৈ কান্দ মাজনী, ক’ভাৰ ফটোত ভাল লাগিব।”
মাজনীয়ে কান্দি কান্দিয়েই লগৰ এজনীক ক’লে, “অলপ ভালকৈ হাঁ, ছাইডৰ পৰা তুলিবি।” লগে লগে ক্লিক্‌-ক্লিক্‌-ক্লিক্‌।
----“বিদায়ৰ মূহুৰ্ত্তত মই আৰু মোৰ মা। ফিলিং এল’ন।”

By: Madhurjya Gogoi